Það má segja að sund sé ein tegund af ferðamáta og hafa þó nokkuð margir tekið sér það fyrir hendur að synda yfir Eyjafjörðinn. Eftirfarandi ellefu manns unnu þetta afrek á árunum 1907-1938.

Karl Hannesson, húsgagnasmiður og málari á Akureyri synti 14. júlí 1907 á sunnudagsmorgni frá Oddeyrartanganum og yfir á 35 mín.

Lárus Rist, sundkennari synti, samkvæmt heitstrengingu veturinn áður þar um, yfir Oddeyrarál 6. ágúst 1907. Hann henti sér út í í öllum fötum og tíndi af sér á leiðinni, var 34 mínútur í sjónum, (viðstaddir læknar sögðu 35 mín., en nemendur Lárusar 25 mín. og þótti Lárusi það líklegra).

Jóhann Ólafsson trésmiður, Arngrímur Ólafsson prentari og Kristján Þorgilsson frá Sökku, allir ættaðir úr Svarfaðardal syntu laugardaginn 18. júlí 1908 yfir Oddeyrarál, þeir voru nemendur Lárusar Rist. Jóhann synti á 24 mín. 15.sek., en hinir á 25 mín. 30 sek.

Sigríður F. Hjartar, 18 ára stúlka, synti yfir Oddeyrarál sunnudaginn 11. júní 1933 á 21 mín. og 20 sek. Sigríður lærði sund á Vestfjörðum, en æfði í Laugaskóla veturinn fyrir sundafrekið.

Guðmundur Matthíasson úr Grímsey synti yfir fjörðinn, af Oddeyrartanga, laugardaginn 26. ágúst 1933 á 22 mín.

Haukur Einarsson og Sigurður Runólfsson, báðir frá KR syntu yfir Oddeyrarálinn þriðjudaginn 10. júlí 1934. Synti Haukur á 19. mín. 8 sek. en Sigurður á 20 mín. 2 sek.