Verzlun Jóns Björnssonar og co. í Borgarnesi

Árið 1907 mynduðu mágarnir Jón Björnsson frá Bæ og Jón Björnsson frá Svarfhóli félag um kaup og rekstur á Langesverslun þeirri er var í Borgarnesi og nefndu það fyrirtæki sitt Jón Björnsson og co. Varð verslun þeirra fljótlega önnur höfuðverslunin í héraðinu ásamt Kaupfélagi Borgfirðinga. Jónarnir voru framfarasinnaðir og tóku upp á ýmsum nýjungum. Meðal annars réðust þeir í byggingu íshúss og ullarþvottastöðvar um miðjan annan áratug síðustu aldar. Ullarþvottastöðin starfaði stutt en íshúsið starfaði lengur og var þar framleiddur ís til að kæla ferskt kjöt og lax.

Upp úr lokum fyrri heimstyrjaldar ákváðu nafnarnir að taka þátt í síldveiðum og keyptu tvo báta, Bifröst og Hermóð sem stunduðu veiðar við Vestfirði og komu sér upp söltunarstöð á Ísafirði. Veiðarnar gengu ágætlega og fór söluverðið hækkandi. Biðu þeir því með að selja en allt í einu varð verðhrun. Leiddi það til að Jón Björnsson og co. varð gjaldþrota árið 1924. Upp úr því stofnuðu Jónarnir hvort sitt fyrirtæki með aðstoð vina og vandamanna. Jón frá Bæ stofnaði Verslunarfélag Borgarfjarðar en Jón frá Svarfhóli stofnaði Verslunarfélagið Borg.