Jarðskjálftinn 1934

Úr frásögn Sigurðar Friðriks Jónssonar f.v. lögreglumanns.

„- Þannig var að ég var staddur að morgni til vorið 1934, ásamt pabba mínum, bræðrum og fleirum við mógrafir fram á Hreiðarsstöðum í Svarfaðardal, þar sem við höfðum mótekju.

- Það var afskaplega gott veður þennan dag, milt og þægilegt. Pabbi ræddi um það að best sé að við tökum okkar grafir dálítið frá gömlu gröfunum, sem þarna voru, við fengjum þá síður vatnið úr þeim yfir okkur. Er svo ekki að orðlengja það, að byrjað er að taka grafirnar. Júlíus frændi og pabbi voru niðri og köstuðu upp á brúnina og við strákarnir tókum við, létum á hestakerru og breiddum síðan til þerris.

Þá heyri ég allt í einu þungan dyn, svo kemur jörðin bara á móti mér eins og brimgarður, nær mér á andartaki, bylgjast undir mér og ég dett kylliflatur, sem og allir sem voru í kringum mig, nema hesturinn sem stóð gleiðfættur og haggaðist hvergi. Margt gerðist þarna á sama augnabliki, en það sem mér þótti undarlegast var, að bæði pabbi og Júlíus þeyttust upp úr gröfinni af þrýstingnum og voru við hliðina á mér, en gröfin fylltist af vatni. Má telja mildi, að við tókum ekki grafirnar fast við hliðina á öðrum móggröfum, því þá hefið vatnið úr þeim steypst yfir þá. En dalbotninn allur varð á augabragði eins og stöðuvatn yfir að líta, því vatnið bókstaflega helltist niður úr hlíðum og giljum fjallanna.

- Það var náttúrulega strax farið heim (í Blakksgerði). Þegar þangað kom var aðkoman ekki glæsileg, útihúsin alveg hrunin, bæði fjósið og hesthúsið, en íbúðarhúsið, hékk vart uppi. Stór gluggi á suðurstafni fór úr í heilu lagi og hentist eina 10 til 15 metra, en ég man ekki eftir, að ein einasta rúða væri brotin. Sem betur fer slasaðist enginn heima og engin dýr voru á húsum. En húsakostur var ónýtur. Við vorum til að mynda nýbúin að steypa fjárhús, sem var orðið vel þurrt, en það sprakk allt og eyðilagist. Og svona var eyðileggingin hvarvetna.“

Í Héraðsskjalasafni Svarfdæla á Dalvík eru að finna ýmsar frásagnir og annað efni frá jarðskjálftanum mikla 1934 ásamt mörgum myndum.