Ein þeirra lausna sem voru alvarlega íhugaðar á bílastæðavanda Reykvíkinga, var að byggja bílastæðahús í miðbænum. Skipuð var nefnd 9. október 1956 til þess að gera tillögur um byggingu bifreiðageymsluhúss. En það var ekki fyrr en árið 1964 að nefndin taldi að ekki mætti lengur draga að hefja fyrir alvöru undirbúning að byggingu slíks húss og var gert líkan af bílastæðahúsi á lóð við Sölvhólsgötu, með stæðum fyrir 340-400 bíla. En ekki reyndist nægur vilji til þess að hefja byggingu hússins.