Myndin með er frá Guðmundi Jónssyni frá Mosdal/Ljósmyndasafnið Ísafirði.

Mynd 1. Vígsluhátíð Sjúkrahúsins á Ísafirði.

Mynd 2. Vígsluljóð Sjúkrahússins á Ísafirði.

Árið 1919 ályktaði bæjarstjón Ísafjarðarkaupstaðar um byggingu nýs sjúkrahúss enda sjúkrahúsið við Mánagötu orðið of lítið. Sett var á fót nefnd sem starfa átti með sjúkrahúsnefndinni til að annast málið og var fyrsta hlutverk þeirra að velja húsinu stað. Fyrir valinu varð Eyrartún enda uppfyllti sá staður öll skilyrði um staðsetningu slíks húss. Guðjóni Samúelssyni húsameistara var falið að vinna að málinu og lagði hann hugmyndir sínar fram við bæjarstjórn árið 1920. Teikning Guðjóns að hinu nýja sjúkrahúsi var samþykkt árið 1923 og um leið samþykkti meirihluti bæjarstjórnar, undir forystu Vilmundar Jónssonar hérðaslæknis, fjárhagsáætlun, sem gerði ráð fyrir framlagi til nýs sjúkrahúss. Þegar ljóst var að hugur fylgdi máli var málið flutt fyrir Alþingi og samþykkti fjáveitinganefnd að mæla með 25 þúsund króna styrk til verksins á fjárlögum ársins 1924, en þá lá fyrir endurskoðuð kostnaðaráætlun upp á 220 þúsund krónur. Jafnframt var gert ráð fyrir því að sömu upphæð yrði veitt næstu tvö árin. Hins vegar samþykkti Alþingi fjárveitinguna með því skilyrði að tryggt væri framlag kaupstaðarins og sýslunnar og að þau ábyrgðust sameiginlega að verkið yrði fullnægjandi og til lykta leitt. Nú brá svo við að þingmaður Norður-Ísafjarðarsýslu taldi ráðlegra að fresta málinu og greiða ríkisframlagið allt í einu, undir þetta tók sýslunefnd og ákvað að fresta málinu til næsta árs.

Nú gerðist atburðarásin hröð og bæjarstjórn tók málið í sínar hendur. Gerð var samþykkt þess efnis að hefja undirbúning framkvæmda, þannig að ríkisstyrkurinn fengist og hægt yrði að hefjast handa strax um haustið. Sýslunefndarmenn voru fengnir til að skrifa undir ábyrgð án skuldbindingar um fjárframlög. Niðurstaðan var sú að kaupstaðurinn stóð einn að byggingunni ásamt ríkinu. Um haustið 1923 hófst vinna á vegum bæjarins við aðdrætti byggingarefnis til hússins og höfðu af því vinnu 30 til 50 menn, sem var kærkomið í árvissu atvinnuleysi þessara ára. Byggingin var boðin út og bárust húsameistara ríkisins sex tilboð í verkið. Lægsta boðið var tekið, en það átti Ásgeir G. Stefánsson húsasmíðameistari og fleiri iðnaðarmenn úr Hafnarfirði. Húsið var vígt þann 17. júní 1925 og var þá eitt glæsilegasta sjúkrahús landsins. Árið 2003 fékk húsið nýtt hlutverk og er nú bóka-, skjala- og listasafn.

Þetta efni er frá:
Héraðsskjalasafni Ísafirðinga