Ýmislegt

• Fisktegundir
• Tenglar
• Uppskriftir

Hvað eru margar fisktegundir við Ísland?

Hinn 15. nóvember 2000 var vitað um 360 fisktegundir sem fundist hafa innan 200 sjómílna lögsögunnar við Ísland, sjá nánar á Vísindavef Háskóla Íslands.

Síldarvalsinn
eftir Harald Zóphoníasson alþýðuskáld úr Svarfaðardal

Syngjandi sæll og glaður
til síldveiða nú ég held.
Það er gaman á Grímseyjarsundi
við glampandi kveldsólareld,
þegar hækkar í lest og hleðst mitt skip
við „háfana“ fleiri og fleiri.
Svo landa ég síldinni sitt á hvað
á Dalvík og Dagverðareyri.

Seinna er sumri hallar
og súld og bræla er,
þá held ég fleyi til hafnar.
Í hrifningu skemmti ég mér
á dunandi balli við dillandi spil
og dansana fleiri og fleiri.
Og nóg er um hýreyg'og heillandi sprund
á Dalvík og Dagverðareyri.

Tenglar

Ótal margar íslenskar netsíður tengjast fiskinum og sjónum. Við tókum saman nokkrar til upplýsingar:

• Fiskistofa
• Hafrannsóknarstofnun
• Skipaskrá
• Siglingastofnun
• Sjóveðurspá
• Vefur Fiskifrétta
• Samtök fiskvinnslustöðva
• Iceland Seafood
• Ríkisútvarpið - sjávarútvegsmál
• Sjávarútvegsráðuneytið
• Samtök fiskverkenda, inn- & útflutningur sjávarafurða

Uppskriftir

Innbæjarsaltfiskur (fyrir fjóra)

Rétturinn á rætur í spánskri uppskrift sem birtist á pakkningum frá Ektafiski á Hauganesi. Í fyrsta skiptið sem eldað var þurfti að laga uppskriftina að því sem til var í búrinu og svo vel þótti takast til að þannig hefur rétturinn verið eldaður allar götur síðan við góðar undirtektir. Þetta er einföld og tiltölulega fljótleg uppskrift - lengstan tíma tekur að skera niður lauk og papriku ef ekki eru til staðar vélar til þess.

1 kg sérútvatnaður saltfiskur til steikingar, roðlaus
2 meðalstórir laukar
2 paprikur
200 g tómatpúrre (Slotts er gott)
1/2 peli rjómi (1,25 dl)
Ólívuolía

Laukurinn og paprikan eru skorin smátt eða söxuð og steikt á pönnu í ólívuolíu. Tómatpúrre hrært saman við, rjómanum síðan hellt yfir og hrært vel saman. Þá á þetta að vera orðið að hálfgerðum graut. Roðlausum, fremur smátt skornum fiskbitunum raðað þétt í grautinn þannig að þeir séu á kafi í honum. Látið krauma við vægan hita í 10 - 15 mínútur. Borið fram á pönnunni. Soðnar kartöflur og heitt hvítlauksbrauð haft með og kalt blávatn eða eitthvað annað að drekka.

Fiskur hússins (Poisson a la maison)

Roðflett ýsuflök eru skorin niður í hæfilega bita, sem síðar eru saltaðir.

3 msk. smjör
1 stk. eggjarauða
örlítill pipar

Þessu er hrært saman og fiskurinn síðan smurður með því.

2 msk. rasp
3 msk rifinn ostur

Þetta er sett yfir fiskinn, sem síðan er látinn í smurt eldfast fat. Dálítið auka smjör er sett með. Þessu er stungið inn í ofn og bakað við 225-250 ° hita í 15 mín. Einum pela af rjóma með hökkuðu dilli eða steinselju er hellt yfir fiskinn. Að þeim tíma liðnum er hann settur í ofninn aftur og bakað í 10 mín. Gott er að setja rækjur yfir áður en rétturinn er borinn fram.