 |
  |
|
|
9. nóvember 2002 |
||
 Norrænn skjaladagur var fyrst haldinn árið 2001. Þá héldu skjalasöfn á Norðurlöndum sameiginlegan kynningardag Vegna góðrar reynslu af því framtaki var ákveðið að slíkur dagur yrði ár hvert, annan laugardag í nóvember. Skjalasöfn á Norðurlöndum opna þá hús sín sérstaklega fyrir almenningi og kynna starfsemi sína. Flest setja upp sýningar á skjölum sem tengjast tilteknu efni. Annað hvert ár er sameiginlegt þema hjá öllum söfnunum. Þess á milli ákveður hvert land sína tilhögun. Í ár er það undir hverju landi komið að ákveða skipan dagsins sem nú er laugardagurinn 9. nóvember. Þjóðskjalasafn Íslands, Borgarskjalasafn Reykjavíkur og héraðsskjalasöfnin hafa ákveðið að tileinka daginn félögum í víðum skilningi. Þau skjalasöfn sem hafa opið þennan dag taka til sýningar og kynningar skjöl einhverra félaga. Mörg félög voru stofnuð hér á landi, einkum þegar leið á 19. öldina og æ síðan. Skjöl frá mörgum þeirra, svo sem fundargerðabækur, hafa sem betur fer ratað á skjalasöfnin. Þessi gögn eru mikilsverðar heimildir um sögu þjóðarinnar. Þeim sem hafa gögn frá aflögðum félögum í fórum sínum, er bent á að koma þeim í örugga vörslu til nærliggjandi skjalasafns, héraðsskjalasafns, Borgarskjalasafns Reykjavíkur eða Þjóðskjalasafns. |
||