Norræni skjaladagurinn er haldinn þann 10. nóvember 2007. Þá vekja skjalasöfn á Norðurlöndum athygli á skjölum sem varpa ljósi á sögu einstaklinga. Þema skjaladagsins í ár fjallar um einstaklinga í skjalasöfnum. Í Skandinavíu heitir það „mennesket i arkivet“ en „mannlíf í skjölum“ er íslenska útgáfan. Markmiðið er að vekja áhuga á rannsóknum á persónusögu, beina athygli að heimildum sem koma að gagni við slíkar rannsóknir og þeim skjalasöfnum sem varðveita þau gögn. Upplýsingar um persónuheimildir munu geta komið mörgum að góðum notum, bæði almenningi og fræðimönnum, og beint sjónum að þeim rannsóknarmöguleikum sem felast í skjölum í vörslu skjalasafna landsins.

Heimildir sem valdar eru til kynningar á skjaladeginum taka ýmist til allrar íslensku þjóðarinnar, stórs hluta hennar eða íbúa sveitarfélags eða annarra hópa svo sem bænda, skattgreiðenda o.s.frv. Manntöl, kirkjubækur og íbúaskrár eru dæmi um lykilheimildir í þessu sambandi. En fjölmargar aðrar heimildir heyra hér einnig til, svo sem fasteignamatskrár, búnaðarskýrslur, úttektarbækur og uppboðsbækur svo að nokkur dæmi séu tekin.