Hvernig er aðgangi að skjölum á skjalasafni háttað?

Reglur um aðgang að skjölum í Þjóðskjalasafni Íslands

Að jafnaði gildir sú regla að hverjum þeim, sem þess óskar, er heimill aðgangur að skjölum í vörslu Þjóðskjalasafns Íslands. Á þessu eru nokkrar undantekningar sem flestar lúta að almannahagsmunum og persónuvernd einstaklinga. Þannig eru þau skjöl, sem innihalda upplýsingar um öryggi og varnir ríkisins, ekki opin almenningi fyrr en að 30 árum liðnum frá myndun þeirra. Sömuleiðis eru skjöl, sem innihalda upplýsingar um persónulega hagi einstaklinga, ekki opin öðrum en þeim, sem málið varðar, fyrr en að 80 árum liðnum frá myndun þeirra. Sjá Upplýsingalög nr. 50/1996 og Lög um persónuvernd og meðferð persónuupplýsinga nr. 77/2000. Eins geta skjöl verið ólánshæf vegna slæms ástands.

Aðgangur að skjölum í Borgarskjalasafni og héraðsskjalasöfnum

Aðgangur fer eftir Upplýsingalögum, Stjórnsýslulögum, Lögum um persónuvernd eða öðrum lögum sem kunna að gilda um ákveðna skjalaflokka. Almennt eru skjöl sveitarfélaganna opin almenningi þegar ákvarðanir hafa verið teknar í erindum. Fyrst og fremst eru lokuð skjöl sem hafa að geyma upplýsingar um einkamálefni einstaklinga eða fjárhagsmálefni fyrirtækja sem sanngjarnt er og eðlilegt að leynt fari. Má þar nefna skjöl barnaverndarnefnda, einkunnir, sálfræðiskýrslur og skattframtöl. Þau skjöl eru eingöngu opin viðkomandi aðila fyrstu 80 árin.